Notum sit tam presentibus quam futuris, quod ego Bertrannus de Curtevais dono et presenti carta confirmo Deo et beato Petro et conventui Cluniacensi, singulis annis, in alodio meo de villa que dicitur Breissa, tam in vita mea quam post mortem meam, duos modios puri vini ad mensuram Cluniaci, et quatuor sextarios frumenti purgati et quintum de faba, aut pro faba tantumdem frumenti, ita duntaxat ut in predicto alodio tam de frumento quam de aliis annonis, [de vino etiam et] denariis, vel qualibet re alia, de omnibus omnino redditibus, ego vel quilibet successorum meorum, nichil prorsus accipiamus donec predictam vini et frumenti et fabarum quantitatem Cluniacus recipiat; eo etiam tenore, ut si ego vel successorum meorum quilibet aliquam injuriam vel quamlibet fraudem de hoc pacto fecerimus, nisi infra octo dies in Cluniacensium monachorum beneplacito satisfecerimus, predictum alodium omnino perdamus, et in Cluniacensium fratrum jus perpetuo cedat. De his autem que dono, refectio die anniversarii patris mei Cluniaci statuta est fieri, tam pro salute anime matris mee quam patris omniumque parentum meorum, necnon pro anima domni Helie monachi, qui fuit hospitalis Cluniacensis, patrisque et matris ejus, omniumque suorum parentum. Pro hac autem donatione recepi ego Bertrannus de Curtevais septingentos solidos Cluniacensis monete a predicto Helia. Ista omnia supradicta laudante et consentiente Juliana, uxore mea. Hujus rei testes sunt: Lethaldus, miles de Curtevais; Martinus, capellanus; Wichardus de Capella; Bernardus Aymerici; Bernardus Pelliciarius; Guntardus; Walterius, homo Stephani de Cretuil, et frater ejus Guntardus; Walinus de Alceis; Guigo, cellerarius de Meleio; Petrus, cementarius; Bernardus Anselmi; Bruno de Rein; Amietus et Tetbertus. Verumtamen, ut hoc donum vel pactum ratum, firmum et inconcussum in eternum permaneat, quatinus cartha ista domni Mathei, Albanensis episcopi, domni etiam Galterii, Cabilonensis episcopi, domni quoque Petri, Cluniacensis abbatis, sigillis muniretur et corroboraretur supplicando obtinui.